Jes 21

Full text search

Jes 21
Jes 21.1
מַשָּׂא מִדְבַּר־יָם כְּסוּפוֺת בַּנֶּגֶב
לַחֲלֹף מִמִּדְבָּר בָּא מֵאֶרֶץ נֺורָאָה׃
Jes 21.2
חָזוּת קָשָׁה הֻגַּד־לִי הַבּוֺגֵד
בּוֺגֵד וְהַשּׁוֺדֵד שׁוֺדֵד עֲלִי
עֵילָם צוּרִי מָדַי כָּל־אַנְחָתָה
הִשְׁבַּתִּי׃
Jes 21.3
עַל־כֵּן מָלְאוּ מָתְנַי חַלְחָלָה
צִירִים אֲחָזוּנִי כְּצִירֵי יֺולֵדָה
נַעֲוֵיתִי מִשְּׁמֹעַ נִבְהַלְתִּי מֵרְאוֺת׃
Jes 21.4
תָּעָה לְבָבִי פַּלָּצוּת בִּעֲתָתְנִי
אֵת נֶשֶׁף חִשְׁקִי שָׂם לִי לַחֲרָדָה׃
Jes 21.5
עָרֹך הַשֻּׁלְחָן צָפֹה הַצָּפִית אָכוֺל
שָׁתֹה קוּמוּ הַשָּׂרִים מִשְׁחוּ
מָגֵן׃ ף
Jes 21.6
כִּי כֹה אָמַר אֵלַי אֲדֹנָי לֵך
הַעֲמֵד הַמְצַפֶּה אֲשֶׁר יִרְאֶה יַגִּיד׃
Jes 21.7
וְרָאָה רֶכֶב צֶמֶד פָּרָשִׁים רֶכֶב
חֲמוֺר רֶכֶב גָּמָל וְהִקְשִׁיב
קֶשֶׁב רַב־קָשֶׁב׃
Jes 21.8
וַיִּקְרָא אַרְיֵה עַל־מִצְפֶּה אֲדֹנָי
אָנֺכִי עֹמֵד תָּמִיד יֺומָם וְעַל־מִשְׁמַרְתִּי
אָנֺכִי נִצָּב כָּל־הַלֵּילוֺת׃
Jes 21.9
וְהִנֵּה־זֶה בָא רֶכֶב אִישׁ צֶמֶד
פָּרָשִׁים וַיַּעַן וַיֺּאמֶר נָפְלָה
נָפְלָה בָּבֶל וְכָל־פְּסִילֵי אֱלֹהֶיהָ
שִׁבַּר לָאָרֶץ׃
Jes 21.10
מְדֻשָׁתִי וּבֶנ־גָּרְנִי אֲשֶׁר שָׁמַעְתִּי
מֵאֵת יְהוָה צְבָאוֺת אֱלֹהֵי
יִשְׂרָאֵל הִגַּדְתִּי לָכֶם׃ ס
Jes 21.11
מַשָּׂא דּוּמָה אֵלַי קֹרֵא מִשֵּׂעִיר
שֹׁמֵר מַה־מִלַּיְלָה שֹׁמֵר מַה־מִלֵּיל׃
Jes 21.12
אָמַר שֹׁמֵר אָתָה בֹקֶר וְגַמ־לָיְלָה
אִמ־תִּבְעָיוּן בְּעָיוּ שֻׁבוּ אֵתָיוּ׃
ס
Jes 21.13
מַשָּׂא בַּעְרָב בַּיַּעַר בַּעְרַב תָּלִינוּ
אֹרְחוֺת דְּדָנִים׃
Jes 21.14
לִקְרַאת צָמֵא הֵתָיוּ מָיִם יֺשְׁבֵי
אֶרֶץ תֵּימָא בְּלַחְמוֺ קִדְּמוּ נֺדֵד׃
Jes 21.15
כִּי־מִפְּנֵי חֲרָבוֺת נָדָדוּ מִפְּנֵי
חֶרֶב נְטוּשָׁה וּמִפְּנֵי קֶשֶׁת
דְּרוּכָה וּמִפְּנֵי כֹּבֶד מִלְחָמָה׃
ס
Jes 21.16
כִּי־כֹה אָמַר אֲדֹנָי אֵלָי בְּעוֺד
שָׁנָה כִּשְׁנֵי שָׂכִיר וְכָלָה כָּל־כְּבוֺד
קֵדָר׃
Jes 21.17
וּשְׁאָר מִסְפַּר־קֶשֶׁת גִּבּוֺרֵי בְנֵי־קֵדָר
יִמְעָטוּ כִּי יְהוָה אֱלֹהֵי־יִשְׂרָאֵל
דִּבֵּר׃ ס

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages