Gen 39

Full text search

Gen 39
Gen 39.1
igitur Ioseph ductus est in Aegyptum emitque eum Putiphar eunuchus Pharaonis princeps exercitus vir aegyptius de manu Ismahelitarum a quibus perductus erat
Gen 39.2
fuitque Dominus cum eo et erat vir in cunctis prospere agens habitabatque in domo domini sui
Gen 39.3
qui optime noverat esse Dominum cum eo et omnia quae gereret ab eo dirigi in manu illius
Gen 39.4
invenitque Ioseph gratiam coram domino suo et ministrabat ei a quo praepositus omnibus gubernabat creditam sibi domum et universa quae tradita fuerant
Gen 39.5
benedixitque Dominus domui Aegyptii propter Ioseph et multiplicavit tam in aedibus quam in agris cunctam eius substantiam
Gen 39.6
nec quicquam aliud noverat nisi panem quo vescebatur erat autem Ioseph pulchra facie et decorus aspectu
Gen 39.7
post multos itaque dies iecit domina oculos suos in Ioseph et ait dormi mecum
Gen 39.8
qui nequaquam adquiescens operi nefario dixit ad eam ecce dominus meus omnibus mihi traditis ignorat quid habeat in domo sua
Gen 39.9
nec quicquam est quod non in mea sit potestate vel non tradiderit mihi praeter te quae uxor eius es quomodo ergo possum malum hoc facere et peccare in Deum meum
Gen 39.10
huiuscemodi verbis per singulos dies et mulier molesta erat adulescenti et ille recusabat stuprum
Gen 39.11
accidit autem ut quadam die intraret Ioseph domum et operis quippiam absque arbitris faceret
Gen 39.12
et illa adprehensa lacinia vestimenti eius diceret dormi mecum qui relicto in manu illius pallio fugit et egressus est foras
Gen 39.13
cumque vidisset mulier vestem in manibus suis et se esse contemptam
Gen 39.14
vocavit homines domus suae et ait ad eos en introduxit virum hebraeum ut inluderet nobis ingressus est ad me ut coiret mecum cumque ego succlamassem
Gen 39.15
et audisset vocem meam reliquit pallium quod tenebam et fugit foras
Gen 39.16
in argumentum ergo fidei retentum pallium ostendit marito revertenti domum
Gen 39.17
et ait ingressus est ad me servus hebraeus quem adduxisti ut inluderet mihi
Gen 39.18
cumque vidisset me clamare reliquit pallium et fugit foras
Gen 39.19
his auditis dominus et nimium credulus verbis coniugis iratus est valde
Gen 39.20
tradiditque Ioseph in carcerem ubi vincti regis custodiebantur et erat ibi clausus
Gen 39.21
fuit autem Dominus cum Ioseph et misertus illius dedit ei gratiam in conspectu principis carceris
Gen 39.22
qui tradidit in manu ipsius universos vinctos qui in custodia tenebantur et quicquid fiebat sub ipso erat
Gen 39.23
nec noverat aliquid cunctis ei creditis Dominus enim erat cum illo et omnia eius opera dirigebat

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages