Eccl 6

Full text search

Eccl 6
Eccl 6.1
noli fieri pro amico inimicus proximo inproperium enim et contumeliam malus hereditabit et omnis peccator invidus et bilinguis
Eccl 6.2
non te extollas in cogitatione animae tuae velut taurus ne forte elidatur virtus tua per stultitiam
Eccl 6.3
et folia tua comedet et fructus tuos perdet et relinqueris velut lignum aridum in heremo
Eccl 6.4
anima enim nequa disperdet qui se habet et in gaudium inimici dat illum et deducit in sortem impiorum
Eccl 6.5
verbum dulce multiplicat amicos et mitigat inimicos et lingua eucharis in bono homine abundat
Eccl 6.6
multi pacifici sint tibi et consiliarii tibi sint unus de mille
Eccl 6.7
si possides amicum in temptatione posside eum et non facile credas illi
Eccl 6.8
est enim amicus secundum tempus suum et non permanebit in die tribulationis
Eccl 6.9
et est amicus qui egreditur ad inimicitiam et est amicus qui odium et rixam et convicia denudabit
Eccl 6.10
est autem amicus socius mensae et non permanet in die necessitatis
Eccl 6.11
amicus si permanserit fixus erit tibi quasi coaequalis et in domesticis tuis fiducialiter aget
Eccl 6.12
si humiliaverit se contra te et a facie tua abscondet se unianimem habebis amicitiam bonam
Eccl 6.13
ab inimicis tuis separare et ab amicis tuis adtende
Eccl 6.14
amicus fidelis protectio fortis qui autem invenit illum invenit thesaurum
Eccl 6.15
amico fideli nulla est conparatio et non est digna ponderatio auri et argenti contra bonitatem fidei illius
Eccl 6.16
amicus fidelis medicamentum vitae et inmortalitatis et qui metuunt Dominum inveniunt illum
Eccl 6.17
qui timet Deum aeque habebit amicitiam bonam quoniam secundum illum erit amicus illius
Eccl 6.18
fili a iuventute tua excipe doctrinam et usque ad canos invenies sapientiam
Eccl 6.19
quasi is qui arat et seminat accede ad illam et sustine bonos fructus illius
Eccl 6.20
in opere enim ipsius exiguum laborabis et cito edes de generationibus illius
Eccl 6.21
quam aspera est nimium sapientia indoctis hominibus et non permanet in illa excors
Eccl 6.22
quasi lapidis virtus probatio erit in illis et non demorabuntur proicere illum
Eccl 6.23
sapientia enim doctrinae secundum nomen est eius et non multis est manifesta quibus autem agnita est permanet usque ad conspectum Dei
Eccl 6.24
audi fili et accipe consilium intellectus et ne abicias consilium meum
Eccl 6.25
inice pedem tuum in conpedes illius et in torques eius tuum collum
Eccl 6.26
subice umerum tuum et porta illam et ne acedieris vinculis eius
Eccl 6.27
in omni animo tuo accede ad illam et in omni virtute tua serva vias eius
Eccl 6.28
investiga illam et manifestabitur tibi et continens factus ne derelinqueris eam
Eccl 6.29
in novissimis enim invenies requiem in ea et convertetur tibi in oblectationem
Eccl 6.30
et erunt tibi conpedes in protectionem fortitudinis et bases virtutis et torques illius in stolam gloriae
Eccl 6.31
decor enim vitae est in illa et vincula illius netura salutaris
Eccl 6.32
stolam gloriae indues eam et coronam gratulationis superpones tibi
Eccl 6.33
fili si adtenderis mihi disces et si adcommodaveris animam tuam sapiens eris
Eccl 6.34
et si inclinaveris aurem tuam excipies doctrinam et si dilexeris audire sapiens eris
Eccl 6.35
in multitudine presbyterorum prudentium sta et sapientiae illorum ex corde coniungere ut omnem narrationem Dei possis audire et proverbia laudis non effugiant te
Eccl 6.36
et si videris sensatum evigila ad illum et gradus ostiorum illius exterat pes tuus
Eccl 6.37
cogitatum habe in praeceptis Dei et in mandatis illius maxime adsiduus esto et ipse dabit cor tibi et concupiscentia sapientiae dabitur tibi

 

 

Arcanum Newspapers
Arcanum Newspapers

See what the newspapers have said about this subject in the last 250 years!

Show me

Arcanum logo

Arcanum is an online publisher that creates massive structured databases of digitized cultural contents.

The Company Contact Press room

Languages