Eccl 19
Eccl 19
Eccl 19.1
operarius ebriacus non locupletabitur et qui spernit modica paulatim decidet
Eccl 19.2
vinum et mulieres apostatare faciunt sapientes et arguent sensatos
Eccl 19.3
et qui se iungit fornicariis erit nequa putredo et vermes hereditabunt illum et extolletur in exemplum maius et tolletur de numero anima eius
Eccl 19.4
qui credit cito levis corde minorabitur et qui delinquit in animam suam insuper habebitur
Eccl 19.5
qui gaudet iniquitati denotabitur et qui odit correptionem comminuetur vita et qui odit loquacitatem extinguit malitiam
Eccl 19.6
qui peccat in animam suam paenitebitur et qui iucundatur malitia denotabitur
Eccl 19.7
ne iteres verbum nequam et durum et non minoraberis
Eccl 19.8
amico et inimico noli enarrare sensum tuum et si est tibi delictum noli denudare
Eccl 19.9
audiet enim te et custodiet te et quasi defendens peccatum odiet te et sic aderit tibi semper
Eccl 19.10
audisti verbum adversus proximum conmoriatur in te fidens quoniam non te disrumpet
Eccl 19.11
a facie verbi parturit fatuus tamquam gemitus partus infantis
Eccl 19.12
sagitta infixa femori carnis sic verbum in corde stulti
Eccl 19.13
corripe amicum ne forte non intellexerit et dicat non feci aut si fecerit ne iterum addat facere
Eccl 19.14
corripe proximum ne forte non dixerit et si dixerit ne forte iteret
Eccl 19.15
corripe amicum saepe enim fit commissio
Eccl 19.16
et non omni verbo credas est qui labitur lingua sed non ex animo
Eccl 19.17
quis est enim qui non deliquerit lingua sua corripe proximum antequam commineris
Eccl 19.18
et da locum timori Altissimi quia omnis sapientia timor Dei et in illa timere Deum et in omni sapientia dispositio legis
Eccl 19.19
et non est sapientia nequitiae disciplina et non est cogitatus peccatorum prudentia
Eccl 19.20
est nequitia et ipsa execratio et est insipiens qui minuitur sapientia
Eccl 19.21
melior est homo qui deficit sapientia et deficiens sensu in timore quam qui abundat sensu et transgreditur legem Altissimi
Eccl 19.22
est sollertia certa et ipsa iniqua
Eccl 19.23
et est qui emittit verbum certum enarrans veritatem est qui nequiter humiliat se et interiora eius plena sunt dolo
Eccl 19.24
et est iustus qui se nimium submittit a multa humilitate et est iustus qui inclinat faciem et fingit non videre quod ignoratum est
Eccl 19.25
et si ab inbecillitate virium vetetur peccare si invenerit tempus malefaciendi malefaciet
Eccl 19.26
ex visu cognoscitur vir et ab occursu faciei cognoscitur sensatus
Eccl 19.27
amictus corporis et risus dentium et ingressus hominis enuntiant de illo
Eccl 19.28
est correptio mendax in ira contumeliosi et est indicium quod non probatur esse bonum et est tacens et ipse est prudens
Arcanum Newspapers
See what the newspapers have said about this subject in the last 250 years!
Show me
