Hos 5

Full text search

Hos 5
Hos 5.1
שִׁמְעוּ־זֺאת הַכֹּהֲנִים וְהַקְשִׁיבוּ
בֵּית יִשְׂרָאֵל וּבֵית הַמֶּלֶך הַאֲזִינוּ
כִּי לָכֶם הַמִּשְׁפָּט כִּי־פַח הֱיִיתֶם
לְמִצְפָּה וְרֶשֶׁת פְּרוּשָׂה עַל־תָּבוֺר׃
Hos 5.2
וְשַׁחֲטָה שֵׂטִים הֶעְמִיקוּ וַאֲנִי
מוּסָר לְכֻלָּם׃
Hos 5.3
אֲנִי יָדַעְתִּי אֶפְרַיִם וְיִשְׂרָאֵל
לֹא־נִכְחַד מִמֶּנִּי כִּי עַתָּה
הִזְנֵיתָ אֶפְרַיִם נִטְמָא יִשְׂרָאֵל׃
Hos 5.4
לֹא יִתְּנוּ מַעַלְלֵיהֶם לָשׁוּב
אֶל־אֱלֹהֵיהֶם כִּי רוּחַ זְנוּנִים
בְּקִרְבָּם וְאֶת־יְהוָה לֹא יָדָעוּ׃
Hos 5.5
וְעָנָה גְאוֺנ־יִשְׂרָאֵל בְּפָנָיו
וְיִשְׂרָאֵל וְאֶפְרַיִם יִכָּשְׁלוּ בַּעֲוֺנָם
כָּשַׁל גַּמ־יְהוּדָה עִמָּם׃
Hos 5.6
בְּצֹאנָם וּבִבְקָרָם יֵלְכוּ לְבַקֵּשׁ
אֶת־יְהוָה וְלֹא יִמְצָאוּ חָלַץ
מֵהֶם׃
Hos 5.7
בַּיהוָה בָּגָדוּ כִּי־בָנִים זָרִים
יָלָדוּ עַתָּה יֺאכְלֵם חֹדֶשׁ אֶת־חֶלְקֵיהֶם׃
ס
Hos 5.8
תִּקְעוּ שׁוֺפָר בַּגִּבְעָה חֲצֹצְרָה
בָּרָמָה הָרִיעוּ בֵּית אָוֶן אַחֲרֶיךָ
בִּנְיָמִין׃
Hos 5.9
אֶפְרַיִם לְשַׁמָּה תִהְיֶה בְּיֺום
תּוֺכֵחָה בְּשִׁבְטֵי יִשְׂרָאֵל הוֺדַעְתִּי
נֶאֱמָנָה׃
Hos 5.10
הָיוּ שָׂרֵי יְהוּדָה כְּמַסִּיגֵי
גְּבוּל עֲלֵיהֶם אֶשְׁפּוֺך כַּמַּיִם
עֶבְרָתִי׃
Hos 5.11
עָשׁוּק אֶפְרַיִם רְצוּץ מִשְׁפָּט
כִּי הוֺאִיל הָלַך אַחֲרֵי־צָו׃
Hos 5.12
וַאֲנִי כָעָשׁ לְאֶפְרָיִם וְכָרָקָב
לְבֵית יְהוּדָה׃
Hos 5.13
וַיַּרְא אֶפְרַיִם אֶת־חָלְיֺו וִיהוּדָה
אֶת־מְזֺרוֺ וַיֵּלֶך אֶפְרַיִם אֶל־אַשּׁוּר
וַיִּשְׁלַח אֶל־מֶלֶך יָרֵב וְהוּא
לֹא יוּכַל לִרְפֹּא לָכֶם וְלֹא־יִגְהֶה
מִכֶּם מָזֺור׃
Hos 5.14
כִּי אָנֺכִי כַשַּׁחַל לְאֶפְרַיִם וְכַכְּפִיר
לְבֵית יְהוּדָה אֲנִי אֲנִי אֶטְרֹף
וְאֵלֵך אֶשָּׂא וְאֵין מַצִּיל׃
Hos 5.15
אֵלֵך אָשׁוּבָה אֶל־מְקוֺמִי עַד
אֲשֶׁר־יֶאְשְׁמוּ וּבִקְשׁוּ פָנָי
בַּצַּר לָהֶם יְשַׁחֲרֻנְנִי׃

 

 

A témában további forrásokat talál az Arcanum Digitális Tudománytárban

ÉRDEKEL A TÖBBI TALÁLAT