Gnedigister Herr. Vor etlich tagen hat mir Gezy Janusch, Obrister Zu groß Wardeyn geschriben, vnnd durch seinen fürnemen vom Adl ainen mich mündlichen ersuchen lassen, Weill die Khayserliche Majestät etc. derselben Pawmaister ainem mit namen Ottauio Baldegara dahin gen groß wardein Zukhommen, vnnd daselbst allerlay Pawnotturfften Zubesichtigen, gnedigist erlaubt. Man sich aber seiner ankhunfft noch vor lengst aldorten versehen hette, alß hat er vor mir Zuwissen begert, Wara? doch die verhinderrung erschine, vnd gebetten, da[?] Er verhannden hie wär, Jch auch beuelch hett, derselben dahin Zuuerordnen, So solle Jch Jme hinschickhen, oder aber, da man dem Baldegara nicht erlauben Wollen, Jme GeZy, damit Er sich darnach Zurichten hette, Zuuerstendigen, darauf Jch Jme, nachdem Jch khain fundament der sachen gewisst, Wider beandtwortet, Jch hette wol verstanden, das Jr Majestät etc. vnd Euer Fürstliche Durchlaut Jme Baldigara sich dahin Zu presentiern gnedigist auferlegt haben, Jch müesste aber glauben, weills bißher noch nicht beschehen wäre, das Jne daran, oder aigne schwachait oder sonsten Haußkhreüz, weill Er weib vnd Kinder hette, verhindert möchten haben, daneben Er dann auch biß auf dato noch nicht ankhomen wäre, Jch wollte aber nicht vnnderlassen, mich der sachen aigentlich Zuerkhundigen, vnnd Jme hernach Bschaid wissen Zulassen.
Damit Jch nun, wann Jch verner von Jme destwegen ersuecht wurde, Jme Zuandtwortten wisste, Bitt Euer Fürstlichen Durchlaut Jch vnnderthenigist, mich dißfallß was derselben gnedigister will, Zu mainer gehorsamisten Nachrichtung, gnedigist Zuuerstendigen, vnnd thue mich Euer Fürstliche Durchlaut vnnderthanigist beuelch. Datum Caschaw, den 7. Juny Anno 84.